Tanganít Estér

Frå Safon.org

Tanganít Estér (hebraisk תַּֽעֲנִית אֶסְתֵּר), eller Esters faste, blir halden frå soloppgang til solnedgang den 13. adár (b’), altså rett før purím. Fasten symboliserer dei tre dagane Estér hammalká (dronning Estér) fasta føre ho gjekk inn til kong Aḥasjverósj (Xerxes).

Dei åra at purím begynner på ved moṣaé sjabbát (på laurdagskvelden), blir fastedagen halden torsdagen føre, altså på 11. adár, i staden, ettersom ein aldri fastar på sjabbát i jødedommen anna enn på kippúr.

Sidan denne fastedagen ikkje er ein av dei fire offentlege fastedagane som blir nemnte i Nebiím (Profetane), er krava om faste relativt milde: Gravide eller ammande kvinner og personar med svak helse er alltid unntekne frå å faste denne dagen.