Skaun kommune
Frå Safon.org
| Våpen | Kart |
|---|---|
| Fil:Skaun komm.png | Fil:NO 1657 Skaun.png |
| Grunnleggande opplysningar | |
| Kommunenr: | 1657 |
| Fylke: | Sør-Trøndelag |
| Kommunesenter: | Børsa |
| Flatevidd: | 223 km² |
| Folketal: | 6 211 (2007) |
| Målform: | Nøytral |
| Internettside: | www.skaun.kommune.no |
| Politikk | |
| Ordførar: | Jon P. Husby (Sp) 2007-2011 |
Skaun er ein kommune i Sør-Trøndelag fylke. Kommunen grensar mot kommunane Orkdal i vest og Melhus i sør og aust. I nord har Skaun felles grense med Trondheim kommune i Gaulosen, ei sidearm av Trondheimsfjorden der elva Gaula har utløpet sitt. Skaun kommune vart danna i 1965 da dei tidlegare kommunane Børsa, Buvika og Skaun vart samanslegne. Dei største tettstadene i kommunen er Buvika, administrasjonssenteret Børsa, Venn, Viggja og Eggkleiva.
Innhaldsliste |
[endre] Næringsliv
Mange av innbyggjarane i Skaun pendlar til arbeidsplassar i nabokommunane, med unntak av dei som arbeider innan landbruket og offentleg sektor. Den største bedrifta er mølna i Buvika (Norgesmøllene). Sjølv om kommunen har ca 6 000 innbyggjarar, finst det stort sett berre daglegvarebutikkar og eit par blomsterforretningar der. Dette kan komma av stor handelslekkasje til nabokommunane. På grunn av dei mange pendlarane blir Skaun ofte omtala som ein bukommune eller sovekommune, men kommunen arbeider aktivt for å trekkje til seg meir næringsliv. Den 30. juni 2005 opna nye E39 gjennom kommunen. Det er knytt stor spenning til ringverknadene av den nye vegen. E39 vart som ein av dei første vegane i Noreg bygd gjennom eit OPS-prosjekt (offentleg/privat samarbeid).
[endre] Skolar
Kommunen har fem barneskular. Jåren/Råbygda skule er den einaste heile skolen i Sør-Trøndelag med nynorsk som opplæringsmål (elles finst det enkeltklassar på andre skular). Ungdomsskoletrinna er samla på Skaun ungdomsskole i Børsa. I Børsa ligg òg Fredly folkehøgskole. Det finst ikkje vidaregåande skule i kommunen; dei fleste går på skular i nabokommunane, særleg i Orkdal, Meldal og Melhus, men òg på skular i Trondheim.
[endre] Kultur
Skaun er kjent for eit rikt kulturliv. Dei frivillige organisasjonane står sterkt; her finst det for eksempel idrettslag, 4H, fritidsklubbar, kor og korps. Revymiljøet er òg godt i Skaun. Den kommunale kulturskolen har tilbod innanfor drama, dans og bildekunst, samt vokal- og instrumentopplæring.
Kulturlivet kan også spela på dei historiske røtene til kommunen, som går heilt tilbake til vikingtida. På Naustan i Børsa står fire bautasteinar som etter folketrua vart bruka som båtfeste av Einar Tambarskjelve. Desse steinane er motiv for kommunevåpenet. Einar Tambarskjelve eigde òg høvdingesetet Husaby ved Venn. Det er strid mellom Skaun og Melhus om Tambarskjelve budde der eller på Gimse i Melhus.
Det som er sikkert er i alle fall at nobelprisvinnaren i litteratur Sigrid Undset budde på ein gard ved Husaby mens ho skreiv delar av trilogien om Kristin Lavransdatter. I bøkene hennar er det også på Erlend Nikolaussønns Husaby at Kristin Lavransdatter ender opp som husfrue. Kvart år den andre helga i august er det eit stemne om «Kristin på Husaby» i Skaun.
Skaun kirkje på Venn er ei steinkirkje frå mellomalderen (kring 1180), og forbi ho går pilgrimsleia vidare mot Nidarosdomen.
[endre] Natur
Kommunen har store friluftsområde som passar godt både for ski og fiske. Det finst 46 fiskevatn, hovudsakleg med aure og røyr. Laks kan fiskast i Børselva og Vigda. Dei mest kjende badeplassane er Grønlandsskjæret og Tråsåvika camping (begge mellom Viggja og Thamshavn), Grønnesset ved Ånøya (også tilrettelagt for funksjonshemma) og Laugasand på Eggkleiva.
Kommuneblomsteren til Skaun er rogn, som òg er omtala i Skaunasongen, skriven av Bjarne Slapgard og Lars Minsaas.
[endre] Kjente personar frå Skaun
- Kari Aalvik Grimsbø, handballmålvakt
- Gudmund Restad, finansminister i Bondevik I-regjeringa
- Einar Tambarskjelve, vikinghøvding (sjå diskusjonen under kultur)
- Jostein Wilmann, syklist
- Egil Aarvik, stortingsrepresentant, statsråd og formann i Nobelkomiteen
[endre] Lenkjer
- Skaun kommune sine heimesider
- Kristin på Husaby
- Kommunefakta (Sør-Trøndelag) - frå Statistisk sentralbyrå
 |
|
| Denne artikkelen er heilt eller delvis basert på artikkelen «Skaun» frå Nynorsk Wikipedia og kan kopierast, distribuerast og/eller endrast slik det er sett opp i GNU fri dokumentasjonslisens. |
